హైదరాబాద్ నగరంలో అమ్నేషియా పబ్ ఘటనను ప్రజలు మరువక ముందే మరో పబ్ లో జరిగిన ఘటన ఆందోళనకు గురి చేసింది. యువతిపై కొందరు దుండగులు దౌర్జన్యంగా వేధించిన ఘటన బయటకొచ్చింది. ఆదివారం తెల్లవారు జామున జరిగిన ఈ ఘటనపై బాధితురాలి ఫిర్యాదుతో వెలుగులోకి వచ్చింది.
హైదరాబాద్ రాయదుర్గం పరిధిలోని ఓ పబ్ కు యూఎన్వో కోసం పనిచేసే ఓ యువతి తన ఇద్దరు స్నేహితులతో కలిసి ఆదివారం అర్ధరాత్రి వెళ్లింది. అక్కడ ఆమెను చూసిన ఇద్దరు యువకులు ఫోన్ నెంబర్ ఇవ్వాలని కోరారు. దానికి ఆ యువతి నిరాకరించింది.
ఆ ఇద్దరితో పాటు మరో ఆరుగురు దుండగులు పూటుగా మద్యం తాగొచ్చి ఆ యువతిని పబ్ బయటకు బలవంతంగా తీసుకెళ్లి రేప్ చేస్తామంటూ బెదిరించారు. ఆ యువతిపై అసభ్యంగా ప్రవర్తించారు.
ఈ సమయంలో ఆమెకు తోడుగా వచ్చిన ఇద్దరు స్నేహితులు ఆ దుండగులను అడ్డుకోబోయారు. ఆమెను రక్షించే ప్రయత్నం చేశారు. దీంతో వారిద్దరిపై ఆ దుండగులు మద్యం సీసాలతో దాడి చేసి తలలు పగలగొట్టారు. వారిద్దరూ ఆస్పత్రిలో చికిత్స పొందుతున్నారు.
బాధితురాలిని రక్షించేందుకు ఆ పబ్ సిబ్బంది కూడా ప్రయత్నం చేశారు. నిందితులంతా ఒక్కసారిగా సిబ్బందిపై బెదిరింపులకు పాల్పడ్డారని తెలిసింది. తెల్లవారుజాము వరకూ యువతిపై ఆ దుండగుల అసభ్య ప్రవర్తన కొనసాగిందని సమాచారం.
ఎంతగా వారించినా వారు మరింత రెచ్చిపోయి తమ ప్రతాపం చూపేందుకే యత్నించినట్లు తెలిసింది. వారిలో బడాబాబుల కొడుకులున్నారని సమాచారం.
ఈ మేరకు బాధితురాలు తనకు జరిగిన అవమానంపై రాయదుర్గం పోలీస్ స్టేషన్ లో ఫిర్యాదు చేసింది. ఈ మేరకు పోలీసులు పబ్ లో విచారణ జరుపుతున్నారు. సీసీ కెమెరాల పుటేజీని పరిశీలిస్తే నిందితులెవరో తేలే అవకాశముంది.
